A.G.B.U. Manoogian-Demirdjian School Հ.Բ.Ը.Մ. ՄԱՆՈՒԿԵԱՆ-ՏԵՄԻՐՃԵԱՆ ՎԱՐԺԱՐԱՆ At the crossroads of service, excellence, and cultural innovation.

Skip to main content
Main Menu Toggle

DHS Church Visit

Այցելութիւն Հայոց Առաջնորդարան

Երեքշաբթի, Մարտ 6ին Սրբոց Ղեւոնդեանց Մայր Տաճար եւ Հայոց Առաջնորդարան (Պրպենք) այցելեց  ՀԲԸՄի Մանուկեան-Տեմիրճեան վարժարանի 12րդ դասարանը: Անոնք նախ մուտք գործեցին մայր տաճար, ուր Արժանապատիւ Տէր Ներսէս քահանան  եւ գրադարանի ու թանգարանի պատասխանատու Պրն. Հայկ Մադոյեանը տուին անհրաժեշտ գիտելիքներ եւ բացատրութիւններ: Ապա, աշակերտները ծանօթացան «Զօրայեան» թանգարանի թանկարժէք իրերուն, որմէ ետք բարձրացան ընդունելութեան սրահ, ուր Առաջնորդ Գերշ. Տէր Յովնան արքեպիսկոպոս Տէրտէրեանի հետ ունեցան օգտաշատ երկխօսութիւն: Յովնան Սրբազան խօսեցաւ Պահքի շրջանին ու աղօթքի մասին, անդրադառնալով նաեւ երիտասարդութեան այսօրուան խնդիրներուն:

Աւարտին, հիւրասիրութենէ ետք, աշակերտները այցելեցին Յովնան Սրբազանին աշխատասենեակը, ծանօթանալով հնատիպ հայերէն գիրքերու:

Շնորհակալութիւն Յովնան Սրբազանին, Տէր Ներսէսին եւ Պրն. Մադոյեանին իրենց հիւրընկալութեան համար: Աշակերտութեան կ'ընկերակցէին վարժարանիս տնօրէնուհի Տիկ. Արփի Աւանէսեանը եւ ուսուցիչներ Տիկ. Ռօզալին Մատոյեանն ու Պրն. Հրաչ Սեփեթճեանը:

 ***

Ռումանահայութեան ղեկավար Վարուժան Ոսկանեան այցելեց Մանուկեան-Տեմիրճեան վարժարան

Չորեքշաբթի, Մարտ 7-ի առաւօտեան, ՀԲԸՄի Մանուկեան-Տեմիրճեան վարժարան այցելեց ռումանահայ պետական-քաղաքական գործիչ, տնտեսագէտ եւ գրող Վարուժան Ոսկանեան, ընկերակցութեամբ Պրն. Օննիկ Կիւլէզեան: Ոսկանեան 2006-2013 թուականներուն վարած է տնտեսութեան եւ առեւտուրի նախարարական պաշտօններ, ղեկավարն է Ռումանիոյ հայոց միութեան 1990-էն իվեր եւ ներկայիս անդամ է Ռումանիոյ խորհրդարանի: Անոր «Շշուկներու մատեան» վէպը թարգմանուած է 18 լեզուներու, որոնց կարգին անգլերէնի (The Book of Whispers): Վէպը հիմնուած է իր ընտանիքին Ցեղասպանութեան պատմութեան վրայ:

Յարգելի հիւրը հիւրընկալուեցաւ վարժարանիս տնօրէնուհի՝ Տիկ. Արփի Աւանէսեանին կողմէ, ներկայութեամբ վարժարանիս գործավար Պրն. Լեւոն Քէշիշեանի եւ Հայկական Բաժնի պատասխանատու Պրն. Հրաչ Սեփեթճեանի: Անդրադարձ եղաւ ռումանահայութեան զարթօնքին եւ ներկային, ինչպէս նաեւ Սփիւռքի մէջ հայկական վարժարաններուն դիմագրաւող վիճակին մասին:

Ապա, հիւրերը շրջեցան դպրոցը, այցելեցին դասարաններ:

Յաջողութիւն կը մաղթենք ռումանահայ քաղաքական գործիչին:

#agbumds