AGBU Manoogian-Demirdjian School Հ.Բ.Ը.Մ. ՄԱՆՈՒԿԵԱՆ-ՏԵՄԻՐՃԵԱՆ ՎԱՐԺԱՐԱՆ At the crossroads of service, excellence, and cultural innovation.

Skip to main content
Main Menu Toggle

Rest in Peace Dr. Vicken Gulvartian

ՀԲԸՄ-ի Մանուկեան-Տեմիրճեան վարժարանի Հոգաբարձական Կազմը, Տնօրէնութիւնը, պաշտօնէութիւնը եւ ուսուցչական կազմը խոր ցաւով կը գուժեն Հոգաբարձական Կազմի երկարամեայ անդամ,  դպրոցէն ներս «Փառատօն» ծրագիրի հիմնադիր Դոկտ. Վիգէն Կիւլվարդեանի մահը։

Աւելի քան քսան տարիներ ան մաս կազմած է մեր դպրոցի հոգաբարձութեան, միաժամանակ անդամ էր Կրթական Մարմինին եւ ատենապետը՝ «Փառատօն»ի։ Որպէս Կրթական Մարմինի անդամ, ան իր կարեւոր ներդրումը ունեցաւ պատրաստելու կրթական նոր ու արդիական ծրագիրներ, ժամանակակից նորութիւններուն համապատասխանեցնելով տարուող հսկայական աշխատանքը։ Որպէս «Փառատօն»ի հիմնադիր եւ ատենապետ, որ ծնունդ առաւ տաղանդաշատ աշակերտներու բացայայտումներով ու ելոյթներով, Փառատօնը վերաճեցաւ հսկայական ծրագիրի մը, որ իր մէջ ընդգրկեց հայ մշակութային արժէքներ, թատրոն, երգ ու պար, խաղեր եւ զուարճութիւն։ Ամենամեայ Փառատօնին ամէն տարի կամաւոր իրենց ներդրումը կը բերէին հարիւրէ աւելի ծնողներ, պաշտօնէութիւն եւ ուսուցչակազմ, հայ համայնքէն ներս դառնալով իւրայատուկ երեւոյթ մը։ Եւ այս բոլորին գլուխը ինքն էր՝ Դոկտ. Կիւլվարդեանը։ Ան իր կարեւոր դերը ունեցաւ նաեւ դպրոցէն ներս հիմնելու արուեստի հզօր բաժանմունք մը՝ թատերախումբերու, պարի, նկարչութեան եւ երաժշտական խումբերու առանձին բաժիններով։ Դպրոցը երախտապարտ կը մնայ Դոկտ. Վիգէն Կիւլվարդեանին, խոնարհելով անոր երկար տարիներու նուիրումին դիմաց։

Թաղման արարողութիւնը պիտի կատարուի Չորեքշաբթի, 17 Փետրուար 2016-ին, կէսօրուան ժամը 1։00-ին, Հայաստանեայց Առաքելական Ս. Պետրոս եկեղեցւոյ մէջ, Վէն Նայս, որմէ ետք հանգուցեալին մարմինը պիտի տեղափոխուի եւ ամփոփուի Հոլիվուտ Հիլզ Ֆորէսթ Լոն գերեզմանատան մէջ։ Ապա, հոգեճաշ պիտի մատուցուի Կլենտէյլի «Ֆինիսիա»  ճաշարանին մէջ։