A.G.B.U. Manoogian-Demirdjian School Հ.Բ.Ը.Մ. ՄԱՆՈՒԿԵԱՆ-ՏԵՄԻՐՃԵԱՆ ՎԱՐԺԱՐԱՆ At the crossroads of service, excellence, and cultural innovation.

Skip to main content
Main Menu Toggle

AGBU President, Mr. Berge Setrakian, visits our School

ՀԲԸՄ-ի նախագահ Տիար Պերճ Սեդրակեան այցելեց Մանուկեան-Տեմիրճեան վարժարան

Watch a video of his visit to our school here.

Հայկական Բարեգործական Ընդհանուր Միութեան նախագահ Տիար Պերճ Սեդրակեան Հինգշաբթի, Հոկտեմբեր 25-ին այցելեց ՀԲԸՄ Մանուկեան-Տեմիրճեան վարժարան, ընկերակցութեամբ ՀԲԸՄ-ի փոխնախագահ Տիար Սինան Սինանեանի, ՀԲԸՄ Կեդրոնական վարչական ժողովի անդամեր Տիկ. Լորի Մունչէրեանի, Տիկ. Լենա Սարգիսեանի, Տիար Երուանդ Տեմիրճեանի, նախագահի խորհրդական Արթուն Համալեանի, ՀԲԸՄ ՄՏՎ-ի հոգաբարձական կազմի ատենապետ Տիար Գէորգ Զօրեանի եւ անդամներու:

ՀԲԸՄ-ի նախագահը դիմաւորուեցաւ վարժարանի տնօրէնութեան եւ Աշակերտական խորհուրդի անդամներու կողմէ: Հիւրերը շրջայց կատարեցին վարժարանի տարբեր բաժիններ եւ դասարաններ: Անոնք ծանօթացան այս տարեշրջանին հիմնովին վերանորոգուած համակարգիչի երկու դասարաններուն, երկրորդականի արդիականացած պարի դասարանին, նախակրթարանի թուաբանութեան դասարանին ու անոր նորարարութիւններուն: Ամէն տեղ, աշակերտները իրենց ելոյթով թէ անմիջական զրոյցով տպաւորեցին հիւրերը:

Ապա, Արտեմիս Նազարեան Ծաղկոցէն ներս Պրն. Սեդրակեան եւ հիւրերը դիմաւորուեցան նախամանկապարտէզի փոքրիկներուն կողմէ՝ ՀԲԸՄ-ի դրօշակներով եւ հայրենաշունչ երգերու փունջով մը:

Երկրորդականի աշակերտութեան հետ զրոյց-հանդիպումը ծրագրուած էր դպրոցին հանդիսասրահին մէջ, ուր Լրագրութեան ակումբի անդամներուն հարցումներուն պատասխանեց Միութեան նախագահը: Ամենատարբեր հարցումներուն ան տուաւ լիարժէք պատասխաններ, խօսելով իր փորձառութեան, մասնագիտութեան, ՀԲԸՄ-ի նախագահի պատասխանատուութեան, հայու ինքնութեան մասին: Աւարտին, փոխանցեց նաեւ իր պատգամը աշակերտութեան, ըլլալու ազնիւ քաղաքացիներ, տիպար հայեր, անպայման ապագային մաս կազմելով հայ համայնքի կազմակերպչական կեանքին:

Տնօրէնուհի Տիկ. Արփի Աւանէսեան դրօշակով մը պատուեց պարոն Սեդրակեանը, որուն վրայ ստորագրած էին անցեալ Մայիսին Հայաստան այցելած եւ Արագածի գագաթը բարձրացած աշակերտներն ու ուսուցիչները:

Օրուան աւարտին, Տնօրէնութիւնը ժողով-հանդիպում ունեցաւ հիւրերուն հետ, ծանօթացնելով վարժարանին արձանագրած յաջողութիւններուն եւ նուաճումներուն:

Պարոն Սեդրակեան մեկնելէ առաջ երախտագիտական խօսքերով գնահատեց աշակերտութիւնն ու տնօրէնութիւնը ցուցաբերուած ջերմ եւ պատշաճ ընդունելութեան համար: Ան մեծապէս արժեւորեց Մանուկեան-Տեմիրճեան վարժարանէն ներս կատարուող դրական աշխատանքները կապուած աշակերտութեան թիւի յաւելումին, ելեւմտական կայունութեան եւ կրթական արդիական ծրագիրներուն հետ: