AGBU Manoogian-Demirdjian School Հ.Բ.Ը.Մ. ՄԱՆՈՒԿԵԱՆ-ՏԵՄԻՐՃԵԱՆ ՎԱՐԺԱՐԱՆ At the crossroads of service, excellence, and cultural innovation.

Skip to main content
Main Menu Toggle

Հայկական վարժարաններու աշակերտութիւնը ստացաւ օրհնութիւնը Ամենայն Հայոց Կաթողիկոսին

Ներկայ էին 9-12րդ դասարաններու աշակերտները Քանոկա Փարքի ՀԲԸՄի Մանուկեան-Տեմիրճեան եւ Փասատինայի Վաչէ եւ Թամար Մանուկեան Երկրորդական վարժարաններու, ինչպէս նաեւ բարձրագոյն կարգերու աշակերտներ ազգային Փիլիպոս, Ֆերահեան եւ Մեսրոպեան վարժարաններէն, եւ Մերտինեան, Յովսէփեան եւ Սահակ-Մեսրոպ վարժարաններու 8րդ կարգի աշակերտները:

Հայրապետական մաղթանքէն ետք, յանուն բոլոր ներկայ վարժարաններու տնօրէններուն, ՀԲԸՄի Մանուկեան-Տեմիրճեան վարժարանի տնօրէնուհի Տիկ. Արփի Աւանէսեան հանդէս եկաւ բարի գալուստի բացման խօսքով: Ապա, ան հրաւիրեց վարժարանի Հայկական Բաժանմունքի վարիչ Պրն. Հրաչ Սեփեթճեանը, որպէսզի վարէ օրուան յայտագիրը:

Վերոյիշեալ ութը վարժարաններուն կողմէ ներկայացուցիչ աշակերտներ ուղղեցին իրենց հարցումները Ամենայն Հայոց Կաթողիկոսին, որոնց ան տուաւ սպառիչ պատասխաններ: Մանուկեան-Տեմիրճեան վարժարանի հարցումը ուղղեց 12րդ դասարանի աշակերտուհի Իզապէլ Զաւեանը, իսկ յուշանուէրն ու դպրոցին տարեգիրքը յանձնեց դարձեալ 12րդ դասարանցի Դաւիթ Մարզպետունին: Հարցումներէն ետք, ելոյթ ունեցան Երեւանի Տիգրանեանի անուան երաժշտական դպրոցի սաները, որոնք խանդավառութեան գագաթնակէտին հասցուցին ամբողջ սրահը:

Հանդիպումին աւարտին, Արեւմտեան թեմի առաջնորդ Յովնան արքեպիսկոպոս Տէրտէրեան սրտաշարժ ելոյթ մը ունեցաւ մեծարելով Ամենայն Հայոց Հայրապետը, որմէ ետք հրաւիրեց զինք, որպէսզի փոխանցէ իր խօսքը:

Գարեգին Բ. բարի մաղթանքներ բաշխեց հայ աշակերտութեան, որպէսզի անոնք դառնան լաւ ուսանողներ, հայրենասէր հայեր եւ պատիւ բերեն իրենց ընտանիքին եւ շրջանակին: Ամենայն Հայոցը իւրաքանչիւր դպրոցի նուիրեց նաեւ յուշանուէր մը:

Հայր Մերով աւարտին հասաւ պատմական հանդիպումը Լոս Անճելըսի հայ աշակերտութեան հետ, որոնց յիշողութեան մէջ անջնջելի պիտի մնայ Ուրբաթ, 27 Հոկտեմբեր 2017ն: