AGBU Manoogian-Demirdjian School Հ.Բ.Ը.Մ. ՄԱՆՈՒԿԵԱՆ-ՏԵՄԻՐՃԵԱՆ ՎԱՐԺԱՐԱՆ At the crossroads of service, excellence, and cultural innovation.

Skip to main content
Main Menu Toggle

ՀԱՅԱՍՏԱՆԻ ԱՆԿԱԽՈՒԹԵԱՆ ՏՕՆԱԿԱՏԱՐՈՒԹԻՒՆՆԵՐ ԴՊՐՈՑԷՆ ՆԵՐՍ

Նազարեան Ծաղկոց

Առաւօտեան տեղի ունեցաւ հաւաք, ուր աղօթքէ եւ քայլերգներէն ետք աշակերտները մասնակցեցան երգերով, իւրաքանչիւրը ունէր իր պատրաստած եռագոյն դրօշակը: Օրուան խորհուրդը փոխանցեց երաժշտութեան սիրուած ուսուցչուհի Տիկ. Մարինէ Պետրոսեան: Աշակերտները որպէս հայ զինուոր խրոխտ քայլերով տողանցեցին բակին շուրջ:

Մանուկեան Նախակրթարան

Դպրոցին հանդիսասրահին մէջ հաւաքուեցան Մանկապարտէզէն հինգերորդ դասարանի աշակերտները, որոնք հանդէս եկան խմբային արտասանութիւններով եւ երգերով՝ դաշնամուրի ընկերակցութեամբ Օրդ. Արուս Անդրէասեանի: Բացման խօսքը կատարեց Նախակրթարանի փոխ-տնօրէնուհի Տիկ. Փառիկ Յարթունեան, իսկ հանդիսավարն էր հայերէնի ուսուցչուհի Տիկ. Մարալ Ոսկեան: Անկախութեան առիթով իր խօսքը փոխանցեց ուսուցչուհի Օրդ. Լարա Արմանի, որ նաեւ ՀԲԸՄ-ՀԵԸ-ի Սան Ֆերնանտօ Հովիտի Սկաուտական Խորհուրդի ղեկավարներէն է: Ան կարեւորեց սկաուտութեան դերը մարդ անհատին կազմաւորման մէջ եւ պատմեց սկաուտներուն Հայաստան կատարած անկրկնելի այցելութեան մասին:

Տեմիրճեան Երկրորդական

Աղաճանեան սրահ հաւաքուեցան նաեւ 6-12-րդ դասարաններու աշակերտները: Ինչպէս Նախակրթարանի պարագային, Երկրորդականի հանդիսութիւնն ալ սկսաւ դրօշակի արարողութեամբ, ՀԲԸՄ-ՀԵԸ Սան Ֆերնանտօ Հովիտի սկաուտներուն կողմէ: 6-րդ եւ 7-րդ դասարաններու աշակերտները կատարեցին ԱՄՆ-ի, Հայաստանի եւ ՀԲԸՄ-ի քայլերգները՝ ղեկավարութեամբ երաժշտութեան ուսուցչուհի Տիկ. Քրիսթինա Խոջոյեանի:

Հայերէն եւ անգլերէն լեզուներով բացման խօսքը կատարեց հանդիսավար Ալեք Մեսրոպեան՝ 11րդ դասարան: Ապա, ներկայացուց օրուան հիւր բանախօսը՝ մեր վարժարանէն 1995-ի շրջանաւարտ Ադրինէ Գրիգորեանը: Ան այսօր կ'ապրի Հայաստան, բեմադրիչ է եւ նկարիչ: Կը պատրաստէ վաւերագրական ժապաւէններ եւ անոր վերջին գործը՝ “Back to Gurun” վերի կարգերու աշակերտները դիտեցին մինչեւ հանդիպումը Ադրինէին հետ:

Գրիգորեան քսան վայրկեանի ընթացքին, շատ դիպուկ կերպով անդրադարձաւ եւ իր աշխատանքներուն, եւ վերջին ժապաւէնին եւ թէ՛ այսօրուան Հայաստանին ու յաջողութեամբ փոխանցեց հայրենասիրութեան կրակը աշակերտներուն մէջ:

Հանդիսութեան երկրորդ մասը նուիրուած էր 11րդ դասարանի Հայաստան կատարած այցելութեան: Տպաւորութիւններ ընթերցեցին Մոնիկա Խաչատրեանն ու Ալէք Մեսրոպեանը: Ապա՝ ներկաները դիտեցին լուսանկարներ եւ վիտէօներ հայաստանեան այցելութենէն, իսկ աւարտին՝ դարձեալ 11րդ դասարանէն Մինաս Քէսապլեան եւ Երուանդ Մալխասեան կատարեցին իրենց դասընկերոջ՝ Արման Ամիրխանեանին գրած ոտանաւորը՝ Հայաստան կատարած իրենց այցելութեան մասին: Շնորհակալութիւն նաեւ իրենց դասընկերներուն՝ Վանին, Արէնին եւ Տանիէլին, որոնք ստանձնած էին լոյսի եւ ձայնի պատասխանատուութիւնը, ինչպէս նաեւ իրենց ուսուցչուհիին՝ Տիկ. Ռոզալին Մատոյեանին:

Փակման խօսքը կատարեց Պրն. Հրաչ Սեփեթճեան:

Երգ ու պար

Օրուան աւարտին՝ ժամը 2:30-էն սկսեալ, ամենափոքրիկներէն սկսեալ, ամբողջ դպրոցով հաւաքուեցանք Նազարեան մարզասրահ, ուր տեղի ունեցաւ երգ ու պար, տօնական մթնոլորտ: Հիւր երգիչներն էին Գրէգ եւ Մայք Արուշանով եղբայրները, ինչպէս նաեւ իրենց ընկերացող DJ International-ը: Մեծով թէ փոքրով աշակերտութիւնը հայկական երաժշտութեան ռիթմին տակ պարեց, ուրախացաւ եւ բարձր տրամադրութեամբ տուն դարձաւ երկար շաբաթավերջի մը հանգիստով:

Շնորհակալութիւն կը յայտնենք հայերէնի բոլոր ուսուցիչ-ուսուցչուհիներուն, ինչպէս նաեւ բոլոր անոնց, որոնք գիտակից իրենց առաքելութեան, ձեռք-ձեռքի տուին, որպէսզի դպրոցէն ներս տիրէ ազգային ոգի: Յատուկ շնորհակալութիւններ Տիկին Դիանա Արուշանովային՝ որուն կը պարտինք օրուան հիւր արուեստագէտներուն ներկայութիւնն ու ելոյթը:

Կեցցէ՛ ազատ եւ անկախ Հայաստանը: