AGBU Manoogian-Demirdjian School Հ.Բ.Ը.Մ. ՄԱՆՈՒԿԵԱՆ-ՏԵՄԻՐՃԵԱՆ ՎԱՐԺԱՐԱՆ At the crossroads of service, excellence, and cultural innovation.

Skip to main content
Main Menu Toggle

<b> Armenia's Independence Day Festivities </b>

Ա.-. Նազարեան Ծաղկոց

Մեր փոքրիկները հայկական դրօշակներով եւ խանդավառ շարքերով տողանցելով հաւաքուեցան «Աղաճանեան» հանդիսասրահ, ուր իրենց ուսուցչուհիներէն Տիկին Լենա Արսլանեան եւ Օրդ. Թինա Սագալեան հանդէս եկան խօսքով եւ պարով: Օրդ. Թինային կ'ընկերակցէր 12-րդ դասարանէն Մայքըլ Մայիսեան: Տիկին Լենա, որ այս ամառ Հայաստան մեկնած էր, մեր փոքրիկներուն ներկայացուց իր տաքուկ տպաւորութիւնները:  Ան շեշտը դրաւ հայ ըլլալու հպարտութեան վրայ: Իսկ Օրդ. Թինային պարը արժանացաւ բոլորին հիացմունքին: Խօսք առաւ նաեւ տնօրէնուհի Տիկին Թագուշ Խոդաբախշեան:  Աշակերտները դրօշակներով պարեցին, սրահը վերածելով փոքրիկ Հայաստանի: Անոնք դիտեցին նաեւ Հայաստանի մասին պատմող տեսանիւթեր:

Կէսօրէ ետք ծաղկոցի մեր փոքրիկներուն այցելեցին արուեստագէտ նուագածուները, որոնց աւանդական դհոլն ու զուռնան մեծ խանդավառութիւն ստեղծեց երեխաներուն քով:

Բ.-. Մանուկեան Նախակրթարան

Մանկապարտէզէն հինգերորդ դասարանի աշակերտները, առաջնորդութեամբ Նախակրթարանի հայերէն լեզուի ուսուցչուհիներուն, նոյն օրը կէսօրին հաւաքուեցան հանդիսասրահ:

Քայլերգներէն ետք, Տիկին Մարալ Ոսկեան աշակերտներուն ծանօթացուց Հայաստանի ներկայի յաջողութիւններն ու անցեալի արժէքները, ցոյց տալով համապատասխան տեսանիւթեր: Աշակերտները ելոյթ ունեցան ոտանաւորներով եւ խմբերգներով՝ առաջնորդութեամբ հայերէնի ուսուցչուհիներուն եւ երգի ուսուցչուհի Օրդ. Արուս Անդրէասեանի:

Օրուան անակնկալը հանդիսացաւ հայերէն երգերու բացառիկ մեկնաբան Յովհաննէս Շահպազեանի ելոյթը, որ մեծապէս խանդավառեց ու պարի հանեց մեր տղաքն ու աղջիկները: Իսկ աւանդական դհոլն ու զուռնան յայտագիրը հասցուցին իր բարձրակէտին:

Աշակերտները պարեղանակներու տակ դուրս եկան սրահէն եւ եռագոյն փուչիկներով շարունակեցին իրենց խաղն ու պարը:

Այնուհետեւ Հայաստանի անկախութեամբ խանդավառ աշակերտները գացին իրենց դասարանները, ուր համտեսեցին հայկական ուտեստներ, պատրաստուած դասարանի կարգ մը ծնողներու կողմէ:

Գ.- Տեմիրճեան Երկրորդական

7-11-րդ դասարանցիներուն յայտագիրը սկսաւ Յովհաննէս Շահպազեանի ազգային-հայրենասիրական երգերու կատարումով: Ամբողջ սրահը կը թնդար: Ապա, հանդիսավար Պրն. Հրաչ Սեփեթճեան անկախութեան նուիրուած տեսանիւթի մը ընդմէջէն ներկայացուց 1988-1991 թուականները:

«Քայլենք Միասին» խմբերգով հանդէս եկան Ալեքսանտրա եւ Լիլիա Եարալեաններ,  Ժուլիէթ Աբրահամեան, Թալիա Թիւթիւնճեան, Ալիք Քիւրտեան եւ Էմըլի  Պէսնիլեան:

Հայաստան կատարած իրենց այցելութեան տպաւորութիւնները կիսեցին 12-րդ դասարանէն Գրիգոր Գրիգորեան եւ Նիքլըս Փափազեան՝ անգլերէնով, իսկ 11-րդ դասարանցիներ Ալինա Սորֆազեան, Սինթիա Պետրոսեան, Թալին Վարդանեան, Ճենիֆըր Ետիկարով եւ Լոռի Փաթաթեան՝ հայերէնով: Յայտագիրը վերջ գտաւ 11-րդ դասարանին Հայաստան կատարած այցելութեան լուսանկարներու ներկայացումով:

 

Դ.- Ճաշկերոյթ-Տօնակատարութիւն

Արդէն աւանդական դարձած է մեր վարժարանէն ներս տօնակատարել անկախութեան տարեդարձը ճաշկերոյթով մը, կազմակերպութեամբ Ծնողա-Ուսուցչական Մարմինին (PTO):  Ուրբաթ երեկոյեան, շուրջ 500 ծնողներ, բարեկամներ, ուսուցիչներ, տնօրէնութիւն եւ աշակերտներ հաւաքուած էին դպրոցին շրջափակէն ներս: Օրուան հանդիսավարն էր Պրն. Հրաչ Սեփեթճեան: Ունէինք հիւր երգիչներ՝ Տիգրան Ասատրեան, Արթուր Յակոբեան՝ Mister X եւ Ժոզէֆ Գրիգորեան: Ազգային երգ-երաժշտութիւնը, դհոլ-զուռնան, նախկին աշակերտուհի Անայիս Աւանէսեանն ու 9-րդ դասարանցի Նաթալի Մոմճեանը՝ պարով, Լիլիա եւ Ալեքսանտրա Եարալեան քոյրերը՝ քանոնով, Անահիտ Չօլաքեանը՝ մեներգով, Եարալեան քոյրերը, Թալիա Թիւթիւնճեանը, Ալիք Քիւրտեանը եւ Ժուլիէթ Աբրահամեանը՝ խմբերգով եւ PTO-ի նախկին եւ ներկայիս նոր ատենապետուհի Տիկին Ալին Փաթաթեանը իր խօսքով  անմոռանալի պահեր պարգեւեցին ներկաներուն: Համադամ ճաշերու եւ քաղցր երաժշտութեան տակ, անոնք ոտքի պահեցին բեմահարթակը մինչեւ ուշ գիշեր:

Շնորհակալութիւն PTO-ի անդամ բոլոր տիկիններուն, որոնց կամաւոր աշխատանքը մեծապէս գնահատելի է: