AGBU Manoogian-Demirdjian School Հ.Բ.Ը.Մ. ՄԱՆՈՒԿԵԱՆ-ՏԵՄԻՐՃԵԱՆ ՎԱՐԺԱՐԱՆ At the crossroads of service, excellence, and cultural innovation.

Skip to main content
Main Menu Toggle

<b> AGBU MDS April 24 Commemoration Assembly & Events </b>

Ապրիլեան Միջոցառումներ ՀԲԸՄ ՄՏՎ-էն ներս

Յարգելու համար Հայոց Ցեղասպանութեան մէկուկէս միլիոն զոհերուն յիշատակը, Ապրիլ 23-ի առաւօտեան ամբողջ աշակերտութիւնը հաւաքուեցաւ Նազարեան սրահ: Ներկայ էին վարժարանիս հոգաբարձութեան ատենապետ եւ ՀԲԸՄ-ի Կեդրոնական Վարչական Ժողովի փոխ-նախագահ Պրն. Սինան Սինանեան, քոնկրէսմէն Պրատ Շըրմըն, Ս. Պետրոս եկեղեցւոյ հոգեւոր հովիւ Արժ. Տ. Շնորհք Աւագ Քհնյ. Տէմիրճեան, ՀԲԸՄ-ՀԵԸ-ի Լոս Անճելըս Սան Ֆերնանտօ  Հովիտի մասնաճիւղի սկաուտներ, ծնողներ, վարժարանիս տիկնանց տարբեր յանձնախումբեր, ուսուցչական կազմ եւ պաշտօնէութիւն:


Սկաուտներու տողանցքով եւ դրօշակի արարողութեամբ սկիզբ առաւ յայտագիրը: Բացման խօսքը կատարեց տնօրէն Պրն. Յակոբ Յակոբեան, որ ապա հրաւիրեց քոնկրէսմէն Պրատ Շըրմընը, որպէսզի փոխանցէ օրուան պատգամը: Ան շեշտեց Ցեղասպանութեան ճանաչման խնդիրը, որպէսզի անոր լոյսին տակ աշխարհ չտեսնէ նոր սպանդներ: Քոնկրէսմէնը ունեցաւ բացառիկ ելոյթ մը տպաւորելով աշակերտութիւնը: Անոր գրասենեակին մաս կը կազմէ 2003-ի մեր շրջանաւարտներէն Արլէթ Աբրահամեանը, որ նոյնպէս ներկայ էր այդ օր:


Տէր Շնորհք աղօթքով եւ հակիրճ խօսքով փոխանցեց իր պատգամը, որմէ ետք հայերէնի բաժանմունքին գլխաւորութեամբ 100-ամեակի սեմին 100 բառեր կրկնելով աշակերտութիւնը ցոյց տուաւ իր հաւատամքը մնալու հայ, պայքարելու Ցեղասպանութեան ճանաչումին ի խնդիր եւ հասնելու պահանջատիրական մեր երազներու իրականացման:


Աշակերտութիւնը դուրս գալով սրահէն իւրաքանչիւրը իր ծաղիկը զետեղեց Երեւանի Ծիծեռնակաբերդի Ապրիլեան յուշարձանի մանրակերտին անմար կրակին շուրջ, լուրջ, լուռ ու տպաւորիչ, հոգեւոր երաժշտութեան տակ: 

***

Մոնթէպէլլոյի մէջ

Նոյն օրը 9-12րդ դասարաններու աշակերտութիւնը մեկնեցաւ Մոնթէպելլօ: Հոն, քաղաքապետարանին դիմաց միացանք Մեսրոպեան եւ Արշակ Տիգրանեան վարժարաններու աշակերտութեան եւ շուրջ մէկուկէս մղոն քայլարշաւով հասանք Ցեղասպանութեան յուշարձան: Տեղի ունեցաւ ծաղկեպսակներու զետեղում եւ գեղարուեստական յայտագիր: Մեր դպրոցէն 11-րդ դասարանցի Սարին Քոթոյեան ասմունքեց Սիամանթոյի «Ափ մը մոխիր»ը, նոյն դասարանէն Մարալ Մարտիրոսեան խօսք առաւ անգլերէն լեզուով, իսկ բարձրագոյն կարգերու հայերէնի ուսուցչուհի Տիկին Ռոզալին Մատոյեան փոխանցեց սրտի իր խօսքը: Օրուան հիւրն էր վարժարանիս նախկին ուսուցիչներէն, ծանօթ մտաւորական եւ երաժիշտ Պրն. Վաչէ Մանկրեան, որ մեծն Կոմիտասի կեանքին միջոցով անդրադարձաւ 20-րդ դարու առաջին Ցեղասպանութեան:


Նշենք նաեւ, որ Ապրիլ ամսուան առիթով պատրաստուած շապիկները աշակերտութիւնը պիտի հագնի նաեւ յաջորդ տարեշրջանին, իւրաքանչիւր ամսուան 24-ին՝ մինչեւ 100-ամեակ: