AGBU Manoogian-Demirdjian School Հ.Բ.Ը.Մ. ՄԱՆՈՒԿԵԱՆ-ՏԵՄԻՐՃԵԱՆ ՎԱՐԺԱՐԱՆ At the crossroads of service, excellence, and cultural innovation.

Skip to main content
Main Menu Toggle

<b> ARMENIAN CULTURAL PROGRAM </b>

Հայերէնի Նախկին Ուսուցչուհի Տիկին Արփի Արսլանեան Ի Պատուի

ԱՇԱԿԵՐՏՈՒԹԻՒՆԸ ԲԱՑԱՌԻԿ ԵԼՈՅԹՈՎ ՅՈՒԶԵՑ ԲՈԼՈՐ ՆԵՐԿԱՆԵՐԸ

Ուրբաթ, Նոյեմբեր 1-ի երեկոյեան, ՀԲԸՄ Մանուկեան-Տեմիրճեան Վարժարանի «Աղաճանեան» հանդիսասրահը ասեղ գցելու տեղ չկար: Աշակերտութիւն, ծնողներ եւ բարեկամներ եկած էին մասնակցելու եւ ակնդիրը հանդիսանալու աշակերտական գեղարուեստական ճոխ յայտագիրի մը, նուիրուած մեծանուն երաժիշտ Արամ Խաչատրեանի ծննդեան 110-ամեակին, «Ամենայն Հայոց Բանաստեղծ» Յովհաննէս Թումանեանի մահուան 90-ամեակին եւ հայերէնի, հայոց պատմութեան եւ կրօնքի նախկին ուսուցչուհի Տիկին Արփի Արսլանեանի քսանհինգամեայ կրթական վաստակին:

Գեղարուեստական յայտագիրի կիսուն, Տիկին Արփի Արսլանեանի կեանքին եւ ուսուցչական տարիներու վաստակին անդրադարձաւ վարժարանիս յարգելի տնօրէն Պրն. Յակոբ Յակոբեան: Որմէ ետք, ՀԲԸՄ-ի Կեդրոնական Վարչական Ժողովի շնորհաւորական նամակ, դպրոցին եւ ուսուցչակազմին կողմէ յուշատախտակ եւ ծաղկեփունջ փոխանցելու համար բեմ հրաւիրուեցան օրուան մեծարեալը, տնօրէն Պրն. Յակոբ Յակոբեանը, Երկրորդական բաժնի փոխ-տնօրէնուհի Տիկին Անահիտ Նալպանտեանը, Նախակրթարանի ուսումնական մասի վարիչ-պատասխանատու, Տիկին Արսլանեանի դուստրը՝ Տիկին Նելլի Արսլանեան-Եղիազարեանը եւ Նազարեան Ծաղկոցի տնօրէնուհի Տիկին Թագուշ Խոդաբախշեանը:

10-րդ դասարանէն Մելընի Պեսնիլեան Տիկին Արսլանեանին յանձնեց յուշանուէր մը իր դասարանցիներուն կողմէ: Ապա, Տիկին Արփի Արսլանեան փոխանցեց իր սրտի խօսքը:

Աշակերտական յայտագիրը ճոխ էր.

-         Հանդիսութիւնը բացուեցաւ Հայաստանի Հանրապետութեան օրհներգով՝ կատարողութեամբ վարժարանիս նորաստեղծ նուագախումբին (orchestra), ղեկավարութեամբ՝ բարձրագոյն կարգերու երաժշտութեան ուսուցչուհի Տիկին Քրիստինա Խոջոյեանի: Անակնկալ եւ աննախընթաց ելոյթ մը արդարեւ:

-         Պար՝ Ուզունտարա. Երաժշտութիւն՝ Արամ Խաչատրեան. Դալար, Գարին Գէորգեաններ եւ Շաքէ Նալպանտեան, 11-րդ դասարան

-         Թատերական պատկեր, Թումանեան, 4-րդ դասարան՝ «Ճնճղուկները»

-         Թումանեանի կենսագրական գիծեր Power-Point presentation, պատրաստութիւն՝ Վան Ոսկեան. ներկայացուցին Սարին Ասլանեան եւ Արմէն Աբրահամեան, 9-րդ դասարան

-         Նախակրթարանի երգչախումբ՝ “Glee Club”, «Ամպի տակից», «Կաքաւիկ»՝ Recorder-ի վրայ մենանուագ՝ Թամար Գարակէօզեան, «Գարուն Երեւան», մեներգ՝ Անահիտ Չոլաքեան.

-         Power-Point presentation լուսանկարներ եւ աշակերտական յիշողութիւններ Տիկին Արսլանեանէն (Պատրաստեց՝ Նիքլըս Փափազեան, 11-րդ եւ Քէւըն Առաքելեան, 10-րդ դասարան), նոյն պահուն «Սիրելի Ուսուցիչ» մեներգ՝ նախկին աշակերտուհի Անիսա Եուսէֆի, դաշնամուրի ընկերակցութեամբ Օրդ. Արուս Անդրէասեանի:

-         Թատերական պատկերներ Թումանեանէն՝ «Խօսող Ձուկը», «Սուտասանը» եւ «Անխելք Մարդը», 5-րդ դասարան

-         Խաչատրեանի կենսագրական գիծեր Power-Point presentation, պատրաստեց եւ ներկայացուց Լիլիթ Մալումեան, 11-րդ դասարան

-         Դաշնամուր, Խաչատրեան՝ Sonatine 3-րդ մաս, Նանօր ՏէրՊետրոսեան, 7-րդ դասարան        

-         Պալէ, «Etude» Խաչատրեան, Ֆըլիշա, Ֆէյթ եւ Կապրիէլլա Քիլէճեան քոյրեր. (4-րդ եւ 5-րդ դասարաններ)

-         Թումանեան. Ոտանաւոր, 9-րդ դասարանէն՝ Արիէլլա Սարգիսեան, Մոնիկա Խաչատրեան, էլիանա Կունճուեան, Երուանդ Մալխասեան եւ Քրիսթինէ Քէշիշեան

-         6-րդ դասարանի երգչախումբ ՝«Իմ Երեւան», «Հայաստան Երկիր»՝ մեներգ Էմըլի Պեսնիլեանի կողմէ, «Մեր Անունն է Հայկական Բանակ»

 

Հանդիսութեան աւարտին, բոլորին դէմքին վրայ ուրուագծուած գոհունակութեան ժպիտը ցոյց կու տար ամիս մը ամբողջ կատարուած աշխատանքին յաջողութիւնը:

Մեծապէս շնորհաւորելի են բոլոր աշակերտները անխտիր, որոնք իրենց լրջութեամբ, պահուածքով, արուեստի բարձր մակարդակով՝ որակ ապահովեցին հանդիսութեան: Արժանին պէտք է մատուցել նաեւ երաժշտութեան զոյգ ուսուցչուհիներուն՝ Տիկին Քրիստինա Խոջոյեանն ու մանաւանդ Օրդ. Արուս Անդրէասեանին, ինչպէս նաեւ հայերէնի բաժանմունքի բոլոր ուսուցիչներուն (Տիկին Մարալ Ոսկեան՝ Թումանեանի թատերական պատկերներ, Տիկին Ռոզալին Մատոյեան՝ Power-Point-ի պատրաստութիւն եւ գիրքերու վաճառք, Պրն. Յովհաննէս Գումրուեան՝  Power-Point-ի պատրաստութիւն եւ արտասանութիւն, Տիկին Աննա Եարալեան՝ լուսանկարահանում, Տիկին Սեւան Տէր Պետրոսեան՝ վիտէօ նկարահանում, Օրդ. Զեփիւռ Տէմիրճեան եւ Տիկին Թագուշ Նալպանտեան՝ քուլիսներու ետին եւ Պրն. Հրաչ Սեփեթճեան՝ հանդիսավար): Շնորհակալութիւն լոյսի եւ ձայնի պատասխանատու Պրն. Վիգէն Մոմճեանին եւ անոր օգնական՝ 11-րդ դասարանցի Լիլիթ Մալումեանին:

Յատուկ շնորհակալութիւն նաեւ Ծնողա-Ուսուցչական Մարմինին (PTO), հանդիսութեան աւարտին պատրաստած կոկիկ հիւրասիրութեան համար: