AGBU Manoogian-Demirdjian School Հ.Բ.Ը.Մ. ՄԱՆՈՒԿԵԱՆ-ՏԵՄԻՐՃԵԱՆ ՎԱՐԺԱՐԱՆ At the crossroads of service, excellence, and cultural innovation.

Skip to main content
Main Menu Toggle

<b> ARMENIAN CULTURAL DAY PROGRAMS «Հայ Մշակոյթի Շաբաթ»ը Դպրոցէն Ներս </b>

Հոկտեմբերը հայ մշակոյթին նուիրուած ամիս է: Այդ առթիւ, այս տարի նոյնպէս դպրոցէն ներս Հոկտեմբեր 21-25 ունեցանք մեր «Հայ Մշակոյթի Շաբաթ»ը նուիրուած Արամ Խաչատրեանի ծննդեան 110-ամեակին եւ Յովհաննէս Թումանեանի մահուան 90-ամեակին:

Նախակրթարանը պատրաստեց հսկայական «Հայ Մշակոյթի Ծառ» մը, ուր ներկայացուած էին հայ մշակոյթի բազմազան երեսները: Չորրորդ եւ Հինգերորդ դասարանները պատրաստած էին նաեւ իրենց «ծառ»ը, որոնք հանդիսասրահին բեմին երկու կողմերը զարդարեցին այս շաբաթ: Դասարաններէն ներս, ամբողջ շաբաթը, իւրաքանչիւր օր Թումանեանէն հեքիաթ մը կարդացուեցաւ եւ ներկայացուեցաւ, ինչպէս նաեւ աշակերտները ծանօթացան համաշխարհային մեծ երաժիշտ Արամ Խաչատրեանի կեանքին ու գործին: Մեր խորին շնորհակալութիւնները հայերէնի ուսուցչուհիներուն:

Հայերէնի դասապահերէն դուրս, նախակրթարանի ծնողներէ կազմուած «Հայ Ոգի» յանձնախումբը շաբթուան ընթացքին ցուցադրեց եւ վաճառեց հայերէն գիրքեր, ազգային երանգներով զարդեր: Աշակերտութեան անվճար տրամադրեց թել-պանիր, թան եւ լաւաշ հաց: Անմասն չմնաց նաեւ Ծնողա-Ուսուցչական Մարմինը (PTO), որ Ուրբաթ օր աշակերտութեան հրամցուց հատիկ:

Վերջապէս, նախակրթարանի Ուրբաթ օրուան հանդիսութիւնը դափնեպսակը հանդիսացաւ ամբողջ շաբթուան միջոցառումներուն: Երգչախումբը՝ ‘Glee Club’, Օրդ. Արուս Անդրէասեանի ղեկավարութեամբ, արտասանութիւն եւ թատերական պատկերներ Մանկապարտէզէն մինչեւ Հինգերորդ դասարան: Կը շնորհաւորենք բոլոր աշակերտները, ինչպէս նաեւ հայերէնի եւ երգի ուսուցչուհիները, որոնք մեծ խանդավառութեամբ եւ մեծ յաջողութեամբ պատրաստած էին գեղեցիկ յայտագիր մը:

Միջնակարգ-Երկրորդականէն ներս, հայերէնի դասապահերուն կազմակերպուեցան հայ մշակոյթին նուիրուած ընդհանուր զարգացման մրցումներ, որոնք նաեւ որպէս դաս փոխանցուեցան բոլորին, կապելով ամերիկահայ մեր աշակերտները իրենց արմատներուն:
Հայ մշակոյթի ամսուան նուիրուած հրապարակային հանդիսութիւնը տեղի պիտի ունենայ Ուրբաթ, Նոյեմբեր 1-ի երեկոյեան ժամը 7:30-ին, Աղաճանեան սրահին մէջ, որուն ընթացքին աշակերտները ելոյթ պիտի ունենան գեղարուեստական ճոխ յայտագիրով մը: Այդ երեկոյ պիտի պատուըուի նաեւ հայոց լեզուի բազմամեայ ուսուցչուհի տիկին Արփի Արսլանեան, որ երկար տարիներու վաստակ ունի մեր վարժարանէն ներս: